Rashtriya Janata Dal ke pramukh Lalu yadav ne 23 June ko Patna mein hui vipakshi dalon ki baithak ke baad hui press conference mein apne chirparichit chutile andaaz mein Congress ke purv adhyaksh Rahul Gandhi se kaha tha ki aap shaadi karein, hum log baarat chalein.
Rajad supremo Lalu Prasad Yadav apne theth andaz ke liye mashhoor hain. Unhone vipakshi ekta aur pradhan mantri ke ummeedwar ko lekar pooche gaye sawal par dotarafa taanz kas diya hai. Laloo ne ek saath Rahul Gandhi ki PM pad ki ummeedwari aur pradhan mantri Narendra Modi par taanz kas diya hai.
‘Bina patni PM House mein rehna galat: Lalu
Lalu Prasad Yadav se jab vipaksh ki or se pradhan mantri pad ke chehre aur Rahul Gandhi ko shaadi karne ki salah ke bare mein poocha gaya, toh RJD pramukh Lalu Prasad Yadav ne kaha, “Jo bhi PM banta hai, use patni ke bina nahin rehna chahiye. Patni ke bina PM aawaas mein rehna galat hai. Ise khatam karna chahiye. Jo bhi pradhan mantri ho, use patni ke saath rehna chahiye.”
#WATCH | When asked about the PM face from Opposition & his earlier advice to Rahul Gandhi to get married, RJD chief Lalu Prasad Yadav says, “Whoever becomes the PM should not be without a wife. Staying at PM residence without a wife is wrong. This should be done away with..,”… pic.twitter.com/uh0dnzyoJk
— ANI (@ANI) July 6, 2023
Lalu Prasad Yadav ke is bayan ko Rahul Gandhi ki ummeedwari par taanz ke roop mein dekha ja raha hai. Saath hi pradhan mantri Narendra Modi ke upar bhi nishaan ke roop mein dekha ja raha hai. Jab unse poocha gaya ki 2024 ke chunaavon mein gathbandhan ko kitni seaten milengi, toh unhone kaha, “Kam se kam 300 seaten.”
Lalu ne PM Modi ko bhrashtachariyon ka convenor bataya
Lalu Prasad Yadav ne pradhan mantri Narendra Modi ko bhrashtachariyon ka convenor bata diya. Laloo se jab poocha gaya ki PM Modi bolte hain ki ek bhi bhrashtachariyon ko chhoda nahin jayega, toh iske jawab mein Laloo ne kaha, “PM Modi toh khud bhrashtachariyon ka convenor hain. Jisko bhrasht boltethe, usi ko Maharashtra mein mantri bana diya. Ye toh munh wale log hain.”
Rahul Gandhi ko di thi shaadi karne ki salah
Rashtriya Janata Dal ke pramukh Laloo Prasad ne 23 June ko Patna mein hui vipakshi dalon ki baithak ke baad hui press conference mein apne chirparichit chutile andaaz mein Congress ke purv adhyaksh Rahul Gandhi se kaha tha ki aap shaadi karein, hum log baarat chalein.
Iske jawab mein Congress neta Rahul Gandhi ne kaha ki aapne kaha, toh (shaadi) ho jaayegi. Bihar ke purv mukhyamantri ne kaha, aap hamari salah nahin maane, vivah nahin kiye. Abhi samay nahin beeta hai. Aap shaadi kariye, hum log baarat chalein. Unhone kaha, aapki mammi (Sonia Gandhi) bolti thi ki hamari baat nahin maante, shaadi karvaiye. Aap shaadi kar lijiye. Laloo Prasad ke is chutile andaz par wahan maujood neta aur anya hansne lage.
